Shefja e famshme dhe restorantorja filipinase, Margarita Forés, ka ndërruar jetë në moshën 65-vjeçare. Sipas raportimeve të Manila Standard, Forés, e cila kishte mposhtur kancerin e tiroides në vitin 2006, u gjet pa ndjenja në dhomën e saj të hotelit në Hong Kong, pasi nuk u paraqit në një takim dreke.
Lajmin për ndarjen e saj nga jeta e konfirmoi i biri, Amado, përmes një postimi prekës në rrjetet sociale. “Miq dhe familjarë të dashur, me zemër të rënduar ndajmë lajmin për humbjen e papritur të mamasë sime, Margarita A. Forés,” shkroi ai. “Familja jonë është në zi për këtë humbje të papritur dhe ju lutemi për lutjet tuaja në këtë kohë të vështirë. Do të ndajmë më shumë informacione në momentin e duhur.”
Autoritetet ende nuk kanë zbuluar shkakun e vdekjes. Vetëm disa ditë para ndarjes nga jeta, Forés ishte aktive në rrjetet sociale, ku më 27 janar ndau disa imazhe nga gatimet e saj të kaluara. Në postimet e fundit, ajo u shfaq gjithashtu në krah të shefit të famshëm Gordon Ramsay. Postimi i saj i fundit në Instagram ishte më 5 shkurt, kur Tatler Philippines e etiketoi në një video pas skenave nga një set fotografik me të birin, Amado.
Një ikonë e kuzhinës filipinase
E lindur në Filipine në vitin 1959, Margarita Forés zbuloi pasionin e saj për kuzhinën pasi u zhvendos në Nju Jork, ku filloi të eksperimentonte me gatimin italian. Në vitin 1986, ajo udhëtoi në Itali për të studiuar kuzhinën tradicionale nën udhëzimin e tre shefave të njohur.
Karriera e saj në gastronomi u shtri për më shumë se tre dekada, duke e bërë atë një pioniere në industrinë e kulinarisë dhe një emër të njohur për promovimin e kuzhinës filipinase në skenën ndërkombëtare. Në vitin 1997, ajo hapi restorantin e saj të parë, Cibo, një restorant italian në Filipine, i cili më pas u zgjerua në një zinxhir me 30 lokacione në të gjithë vendin.
Në një mesazh ngushëllimi në Facebook, stafi i Cibo shkroi: “Nderojmë jetën dhe trashëgiminë e themelueses sonë dhe udhëheqëses së frymëzimit, Chef Margarita Forés. Ngrohtësia, kreativiteti dhe shpirtmadhësia e saj do të vazhdojnë të na frymëzojnë gjithmonë. Faleminderit që ndave zemrën tënde me ne, Chef Margarita. Do të jesh gjithmonë Cibo.”
Përveç Cibo-s, Forés hapi edhe restorante si Lusso, Grace Park dhe Loggia. Ajo zotëronte gjithashtu një biznes catering-u, Margarita Signature Caterer, dhe një shërbim floristik, Margarita Floralscapes. Në vitin 2016, ajo u shpall “Shefja më e mirë femër në Azi”.
Në një intervistë të fundit për Tatler Asia, Forés tregoi se po mendonte të ulte ritmin e punës. “Në moshën 65-vjeçare, kam kuptuar se kam punuar shumë gjatë gjithë jetës. Çfarë dua vërtet tani është të ngadalësoj pak,” tha ajo. “Amado mendon se catering-u më merr shumë energji dhe se nuk më nevojitet më ajo lodhje… Ai ka ide të qarta për të përmirësuar konceptet e mia ekzistuese. Për mua, është një bekim i madh, sepse, në fund, planifikimi i trashëgimisë është diçka natyrale për familjet filipinase.”
Largimi i papritur i Margarita Forés lë një boshllëk të madh në botën e kulinarisë, por trashëgimia e saj do të vazhdojë të frymëzojë brezat e ardhshëm të shefave dhe dashamirësve të gastronomisë.
