Personazhi televiziv, gazetari, analisti Arian Çani i ftuar në emisionin Dekalog nga Roland Qafoku në DritareTV, foli për situatën politike sot. Çani tregon arsyet se përse sipas tij, Rama do të fitojë sërish më 11 maj.
Arian Çani: Nga ky pozicion ku jam totalisht neutral, nuk kam vënë bast për asnjë palë. Mua më duket se jeta politike është mirë në Shqipëri. Nga pozicioni im është mirë, sepse tani jam i pavarur, nuk jam i kapur, që të bëj propagandën e asaj pale.
Roland Qafoku: Arsyet se përse jemi në këtë situatë sot, që Rama dhe PS-ja pritet të fitojnë më 11 maj?
Arian Çani: E para sepse Rama e ka dashur pushtetin më shumë sesa aktorët e tjerë politikë kryesore. E ka dashur që në rininë e tij, kur takoi Berishën në 1991-shin. Pra ambicia e tij e tejskajshme. Kjo është çështje karakteri. Edhe Berisha e do pushtetin, por nuk qe i zoti ta zgjaste kaq shumë. Këtu ndryshon Rama nga të tjerët. Kush mendon që Rama një ditë do lodhet edhe do të ikë, ia fusin kot. Nuk ka si lodhet Rama, sepse politika është vetëm ushqim për të./K.C/dritare.net
