Jo, s’ju bëjnë sytë! 1 MILION $ për person është tarifa e kërkuar nga kreu aktual i Shtëpisë së Bardhë për të marrë pjesë në një takim privat me të, në vilën e tij të famshme Mar-a-Lago në Palm Beach, Florida.
Shifrën e kripur 1 MILION $ për të qenë në rezidencën Mar-A-Lago në “Darkën Trumpiane”, e ka paguar edhe Gon Shehaj.
Për lobistët që janë të gatshëm të paguajnë biletën elitare prej 5 MILION $, ky event është gjithashtu një mundësi për të diskutuar biznes ballë për ballë me miliarderin.
Por në një reagim në rrjetet sociale, Shehaj deklaroi se ndodhet në këtë event ekskluziv për të lobuar në interes të qytetarëve shqiptarë dhe për të kërkuar mbështetjen e vazhdueshme të Amerikës në luftën kundër korrupsionit dhe krimit në Shqipëri.
“Ju përshëndes nga Mar-a-Lago, në këtë vend ku njerëz të pushtetshëm, politikanë, sipërmarrës mblidhen për t’i dhënë zgjidhje problemeve të botës.
Unë jam këtu në këtë vend ku pjesa më e madhe e politikanëve shqiptarë kërkojnë të vijnë duke lobuar me paratë që u kanë vjedhur qytetarëve shqiptarë. Në fakt, unë nuk jam këtu për interesin tim por jam këtu për të lobuar për interesin e qytetarëve shqiptarë dhe interesat e Shqipërisë.
Amerika duhet të vazhdojë të mbështesë drejtësinë, të mbështesi luftën kundër korrupsionit dhe kundër krimit në Shqipëri. Por nuk mund të presim vetëm nga SHBA por duhet të bëjmë dhe pjesën tonë. Duhet që përfundimisht të heqim dorë nga partitë e vjetra dhe të shikojmë drejt së ardhmes”,-deklaroi Shehaj.
Por skandalet nuk ndalen këtu. Së fundmi, burime pranë grupeve rinore dhe aktivistëve në rrjetet sociale bëjnë me dije se kandidati Shehaj, i cili ka investuar fort në marketing dhe propagandë, po financon call center të tëra që komentojnë në rrjete sociale kundër Adriatik Lapajt. Sipas të njëjtave burime, kjo vjen si pasojë e faktit që Shehaj është shumë më poshtë në sondazhe dhe e sheh Lapajn si të vetmin kundërshtar dinjitoz në garë.
Manipulimi i opinionit publik përmes komenteve të blera nuk është diçka e re në Shqipëri, por rasti i Shehajt po ngre pikëpyetje të mëdha mbi mënyrën si ai po përpiqet të ndërtojë “popullaritetin” e vet. Në vend që të konkurrojë me ide dhe vizion, ka zgjedhur rrugën e vjetër: propagandë, sulme ndaj kundërshtarëve dhe fushata të sponsorizuara në prapaskenë.
Ndërkohë, Lapaj vazhdon të fitojë mbështetje me qasje qytetare dhe ton institucional, duke u bërë gjithnjë e më shumë një alternativë serioze për shqiptarët që duan ndryshim të vërtetë.
