Një listë që pasqyron pagat mujore të administratorëve, drejtuesve ekzekutivë, koordinatorëve dhe punonjësve në organizata të financuara nga USAID dhe Fondacioni Soros në Shqipëri është publikuar në media së fundmi.
Sipas kësaj liste të publikuar nga portali investigativ ‘Boldnews.al‘, shumë pozicione kanë paga që variojnë nga 187,000 lekë deri në 3.1 milionë lekë të reja në muaj. Fondacioni Soros renditet me disa nga pagat më të larta, ndërsa organizatat e tjera financuara nga USAID gjithashtu shfaqin shifra të konsiderueshme.
Kjo çështje u diskutua mbrëmjen e sotme në emisionin ‘Zonë e Lirë’ në MCN TV, ku drejtuesi Arian Çani trajtoi temën e këtyre pagesave të mëdha. Në mënyrë të papritur, sinjali i emisionit u ndërpre dhe ekrani mbeti i zi për disa minuta.
Pas rikthimit të emisionit, Çani la të nënkuptohet se diçka e pazakontë kishte ndodhur, por nuk dha detaje të mëtejshme.
Kjo ndërprerje e sinjalit ka ngritur pikëpyetje për shkakun e saj, duke qenë se ndodhi pikërisht në momentin kur diskutohej lista e pagave të USAID dhe Fondacionit Soros. Ndërprerje të tilla gjatë trajtimit të temave të ndjeshme kanë shkaktuar gjithmonë spekulime në publik, megjithëse deri tani nuk ka asnjë informacion zyrtar për shkakun e saj.
Publikimi i kësaj liste dhe ndërprerja e pazakontë gjatë emisionit theksojnë edhe një herë rëndësinë e transparencës dhe përgjegjshmërisë kur bëhet fjalë për fonde ndërkombëtare dhe financime në Shqipëri.
