Eksperti i kriminalistikës, Ervin Karamuço, ka folur në emisionin Top Story për metodologjitë që përdoren për të shmangur përgjimet, duke theksuar se disa persona po përdorin kuti të posaçme, të sjella nga Kina, për të mbajtur telefonat të papërgjuar.
Karamuço ka përmendur gjithashtu përdorimin e mikrovalave, një metodë e padëgjuar më parë.
“Kanë ardh ca kuti nga Kina ku i fusin telefonat për të mos u përgjuar. Madje ka nga ata që i fusin edhe në mikrovë, kjo për shkak të vetë mekanizmit që mikrovala ka ose bisedat i bëjnë në parkingje ose vende të thella, ku nuk nuk ka valë. Janë në një presion dhe lak të madh. Do vijnë edhe 40 hetues të rij, tepër të trajnuar. Por ajo që shikoj është se përballja do të jetë shumë e fortë,” tha Karamuço.
Sipas tij, BKH duhet të adoptojë taktika të reja kur realizon kontrolle, siç është shmangia e pranisë së fëmijëve. Karamuço gjithashtu ka përmendur se ka pasur raste të tentativës për vetëflijim, për shkak të presionit të madh që disa individë kanë përjetuar.
“BKH duhet të zhvillojë një taktikë të re kur bën kontrolle në banesë. Për shembull nuk duhet të ketë fëmijë. Kontrollet duhet të jenë më humane, duhet të jetë më të kontrolluara. Ka pasur raste deri në tentativë vetëflijimi, për shkak se nuk e përballonte dot presionin,” tregoi Karamuço.
