Një tërmet me magnitudë 4.3 ballë është regjistruar sot pranë Vlorës, duke shkaktuar panik te qytetarët. Lëkundjet u ndjenë në disa zona të qytetit, por fatmirësisht nuk raportohen dëme materiale apo të lënduar. Megjithatë, frika mbetet e madhe, pasi ky tërmet vjen në një kohë kur Greqia po përballet me një seri lëkundjesh sizmike, veçanërisht në zonën e Santorinit, ku situata po bëhet gjithnjë e më shqetësuese.
Santorini në alarm, banorët flenë jashtë nga frika
Prej 48 orësh, Santorini dhe zonat përreth janë goditur nga mbi 200 lëkundje sizmike, disa prej të cilave kanë qenë të fuqishme dhe të përsëritura. Tërmeti më i fundit, me magnitudë 4.6 ballë, ndodhi sot në orën 13:55, me epiqendër 19 kilometra në jug-juglindje të Arkesinit, Amorgos, dhe një thellësi fokale prej 14.1 km.
Ky tërmet vjen pas një serie goditjesh të tjera gjatë ditës së sotme:
• Ora 12:04 – Tërmet me magnitudë 4.3 ballë
• Mëngjesi – Dy tërmete me magnitudë 4.5 dhe 4.1 ballë
• Mbrëmja e djeshme – Dy tërmete të njëpasnjëshme me magnitudë 4.7 dhe 4.5 ballë
Lëkundjet e vazhdueshme kanë krijuar një ndjenjë pasigurie te qytetarët, të cilët kanë frikë të qëndrojnë brenda banesave të tyre. Autoritetet greke kanë ngritur çadra emergjente në hapësira të sigurta, duke inkurajuar banorët që të shmangin ambientet e mbyllura dhe ndërtesat e vjetra, për shkak të rrezikut të shembjes në rast të një goditjeje më të fuqishme.
Epiqendra e shumicës së këtyre tërmeteve është regjistruar në zonën e Anhidros, një ishull i pabanuar pranë Santorinit, një fakt që ka ngritur shqetësime te sizmologët, të cilët po monitorojnë situatën për të kuptuar nëse ky aktivitet është pararojë e një tërmeti edhe më të fuqishëm.
Shqipëria në tension pas lëkundjeve në Vlorë – Çfarë pritet të ndodhë?
Tërmeti i regjistruar sot në Vlorë ka shqetësuar qytetarët shqiptarë, të cilët janë të ndjeshëm ndaj lëkundjeve sizmike, veçanërisht pas tërmetit tragjik të 26 nëntorit 2019. Edhe pse nuk ka dëme të raportuara, frika mbetet e lartë, sidomos për faktin se lëkundjet po ndodhin në të njëjtën periudhë me ato në Greqi.
Ekspertët sizmologë po ndjekin nga afër zhvillimet, ndërsa theksojnë se Shqipëria dhe Greqia ndodhen në një zonë me aktivitet të lartë sizmik, ndaj lëkundje të tilla janë të pritshme. Megjithatë, ata paralajmërojnë se situata duhet monitoruar me kujdes, pasi tërmetet e shpeshta mund të jenë sinjal i një goditjeje edhe më të madhe.
Ndërkohë, qytetarët në Shqipëri dhe Greqi janë të këshilluar që të tregojnë kujdes dhe të ndjekin udhëzimet e autoriteteve. Nëse aktiviteti sizmik vazhdon, ekspertët mund të rekomandojnë masa të tjera mbrojtëse, përfshirë edhe evakuime të mundshme në zonat më të rrezikuara.
