15-vjeçari dyshohet se u largua nga shtëpia pas debatit me të atin
Një 15-vjeçar në Shkodër ka alarmuar familje ne tij, pasi është larguar nga shtëpia dhe nuk dihet se ku ndodhet.
Mësohet se ngjarja ka ndodhur në fshatin Postribë, teksa babai i të miturit, Agim Bibaj tregon se i biri është nisur në mëngjes për në shkollë por nuk është futur në mësim, duke u larguar në drejtim të paditur. Që nga ai moment nuk ka shkuar në shtëpi, gjë e cila ka alarmuar familjen e tij.
Babai ka bërë menjëherë denoncim pasditen e 11 nëntorit në policinë vendore të Shkodrës. Bibaj dyshon se djali i tij është larguar për shkak se ditët e fundit e ka qortuar që të mos bëjë sjellje të keqe dhe përplasjen me babain, djali ia ka shprehur vetëm shokëve dhe jo familjes.
Bibaj thotë se nuk ka ushtruar dhunë fizike ndaj tij por vetëm e ka këshilluar si çdo prind që te ketë një sjellje të mirë në shoqëri, gjë për të cilën dyshon se i biri është irrituar duke vendosur të largohet nga banesa.
Agim Bibaj i bën thirrje kujtdo që mund ta ketë parë djalin e tij që ta njoftojnë. Po ashtu ka një thirrje edhe për të birin duke i thënë që të kthehet sa më parë sepse e kërkojnë nëna, vëllezërit dhe motra.
